Shreyas Holds the Power

India aur Zimbabwe ke beech T20 series ka aagaaz aaj shaam 4:30 baje se hoga. Lekin match shuru hone se pehle hi sabse bada sawaal playing XI ko lekar hai. Top order lagbhag tay maana ja raha hai. Abhishek Sharma aur Vaibhav Sooryavanshi opening karenge. Unke baad Ishan Kishan, captain Shreyas Iyer aur vice-captain Tilak Varma batting order ko sambhalenge. Shivam Dube bhi playing XI ka hissa honge. Asli confusion number 7 se shuru hoti hai. Reports ke mutabik Shubham Shinde ko mauka mil sakta hai. Harsh Dubey bhi playing XI mein nazar aa sakte hain. Lagbhag ek saal baad Mayank Yadav ki wapsi hone ja rahi hai, jabki Ashok Sharma ko bhi debut ka mauka mil sakta hai. Lekin sabse bada selection sawaal Ravi Bishnoi ko lekar hai. Kya India ek specialist wicket-taking leg-spinner ke saath utrega, ya batting depth ke chakkar mein Bishnoi ko bhi bench par bitha diya jayega? Yeh dekhna kaafi interesting hoga. Is series ki sabse badi baat sirf playing XI nahi hai. Is baar power Shreyas Iyer ke haath mein hai. Gautam Gambhir is tour par team ke saath nahi hain aur head coach ki zimmedari VVS Laxman sambhal rahe hain. Aise mein playing XI, bowling changes aur on-field tactics mein captain ka role pehle se kahin zyada bada hoga. Isi wajah se is series mein Shreyas Iyer par sabse zyada nazar rahegi. Agar team combination chal gaya to credit bhi unhe milega. Aur agar selection ya tactics fail hui, to sawal bhi sabse pehle unse hi pooche jayenge. Zimbabwe ke khilaaf ye series sirf ek aur bilateral series nahi hai. Ye dekhne ka mauka hai ki Shreyas Iyer apni leadership ko kis tarah handle karte hain, aur jab dressing room mein faislon ka sabse bada haq captain ke paas ho, to Team India kis tarah ki cricket khelti hai.