India' s Injuries Concerns ahead of SL Tour

India ke paas is WTC cycle mein sirf 9 Test matches bache hain. Aur agar World Test Championship Final ki race mein rehna hai, toh lagbhag 8 jeetne padenge. Lekin Sri Lanka tour se pehle hi Team India ka combination hil chuka hai. Sabse bada concern hai Washington Sundar. Reports ke mutabik unhe Grade 2 right hamstring injury hui hai aur recovery mein kam se kam 30 din lag sakte hain. Aur ye sirf ek player ki injury nahi hai. Sri Lanka ki highly humid aur spin-friendly conditions mein Washington Sundar India ke eklaute off-spinning all-rounder hain. Agar woh available nahi hote, toh Team India ka poora balance hi bigad jaayega. Doosri taraf Jasprit Bumrah bhi filhaal NCA mein hain. England ke khilaaf doosre ODI mein unke left knee, yani unke landing leg par impact injury hui. Reports ke mutabik unke knee mein fluid bhar gaya tha aur bruising ki wajah se uska colour purple tak ho gaya. Bumrah recover bhi kar lete hain, tab bhi Sri Lanka mein unse dono Test matches khilana bahut mushkil lagta hai. Kyunki uske turant baad New Zealand Test series bhi hai. Aur Bumrah ki injury history ko dekhte hue, mujhe bilkul surprise nahi hoga agar woh Sri Lanka mein dono Test matches na khelen. Phir aate hain Nitish Kumar Reddy. Afghanistan series mein unhe quadriceps injury hui thi. Nitish sirf ek batter nahi hain. Woh bat aur ball dono se Team India ko balance dete hain. Unki absence bhi playing XI ko seedha affect karegi. Aur Harshit Rana bhi Grade 1 hamstring injury ke saath NCA mein recovery kar rahe hain. England ke khilaaf teesra T20 unka aakhri match tha. Matlab Sri Lanka Test series se pehle Team India ke chaar important players NCA mein hain—Washington Sundar, Jasprit Bumrah, Nitish Kumar Reddy aur Harshit Rana. Ye sirf injury update nahi hai. Ye Team India ke combination ki sabse badi tension hai.